La Usc di Ladins

Che se contei pa doi èlbres che se scontra te na sia? E soraldut che se contei pa n pec fascian e n lèrsc badiot, vitimes de Vaia, la gran tampesta che à dessatà nesc bie bosć del 2018?

Vegnaron prest a l saer ajache »L’èlber conta – Le lëgn cunta« l’é l projet teatrèl che à metù ensema l grop de »I Bontemponi« da Fascia con la partezipazion de l’ator badiot Simon Kostner. N teater interladin lurà fora sun n test de Vigilio Iori che l l’à metù jù da na idea de David Dorich. 

La regìa é stata touta sù da Ilaria Chiocchetti, la lumes e l’audio é de Benedikt Valentin, la scenografìa de David Dorich e Luca Florian, la grafica de Letizia Pezzei. I atores che jirà sun paladina l’é Letizia Pezzei, Manuela Rasom, David Dorich, Ivano Favè, Simon Kostner e Ismael Pellegrin.

L prum apuntament é en vender ai 25 de setember a La Gran Ciasa a Soraga, en sabeda ai 26 l vegnarà portà a La Ila te Ciasa de Cultura, ai 3 de otober a Urtijëi te Cèsa di Cungresc, ai 4 de otober a Rèba te Sèlf di Congresc, ai 9 de otober a Cianacei te Chino Marmolèda e ai 10 de otober a la Val te Salf dles manifestaziuns. Duc i apuntamenc é da les 20.30, l’entrèda é debant con bonaman, te Badia ge vel prenotèr l post al 333 2525740. 

L projet l’à l sostegn di Comuns, de la Unions di Ladins de la valèdes, de la Region Trentin-Südtirol, del Comun general de Fascia, del Consorzie Eletrich de Poza, la Volksbank, la Coprativa de Fascia e l’é stat metù ensema col didament ence de Andrea Pizzinini, Ulrike Frenademez, Erna Irsara, Gioia Corazzin e la scola de schi La Ila. 

De più su La Usc 37 de vender ai 18 de setember  (Monica Cigolla)