La Usc di Ladins

Na setantina de genitores se à binà anché da doman, lunesc ai 9 de november, tedant la Sorastanza de la Scola Ladina de Fascia per protestèr pazificamenter contra l’obligh, manà fora en vender passà dal Goern e tout sù ence da la Provinzia de Trent, per i bec dai 6 egn en su de cogner tegnir sù l couribocia a dò a dò ence canche i é senté jù te clasc te so banch.

Da anché bonora te la Provinzia de Trent i scolees de la scoles autes é resté a cèsa per fèr la didatica a distanza ma duc i etres, chi de la populères e mesènes, à podù seghitèr a jir a scola con l’obligh de tegnir sù a dò a dò l couribocia.

Jà en vender passà se à moet via n bel grop de genitores de dut l Trentin e i à tout sù passa 900 sotescrizions de genitores, soraldut de Fascia e Fiem, che é de contra a chesta dezijion e domana de poder manèr i fies a scola en prejenza con la regoles da inant: distanza, couribocia canche i leva sù per se spostèr, gel per se dejenfetèr la mans, ence tegnù cont che la situazion di contajes tel Trentin é desvaliva da l’autra pèrts de la Tèlia.

La protesta se à slarià fora amò de più te chest fin de setemèna passà con l passaparola. I genitores de Fascia se à metù d’acort de se troèr duc chenc da les diesc da doman tedant la Sorastanza con striscions e placac e n muie de genitores à tegnù si fies a cèsa.

La portaousc Manuela De Pellegrini da Moena é jita a rejonèr con l sostitut Sorastant Claudio Valentini endèna che i genitores é resté pazificamenter, con la soravèrda di Carabinieres, a manifestèr tedant scola.

»Son n muie contenta de coche l’é jit l coloquie con l sostitut Sorastant Valentini – à dit Manuela De Pellegrini – che l’é stat n muie desponibol. 

Per chel che varda l’atività motoria, ajache la setemana passada i bec à cognù la far con l couribocia, enceben che con le distanze no servissa l tegnir sù, Valentini se à jà out al RSPP (l responsabol del Servije Prevenzion e Protezion) de la segureza sul lurier e a l’ofize de programazion e organisazion de la scola per ge domanar schiarimenc. 

Per chel che varda enveze nosce istanze su la doura del couribocia canche i bec i é senté jù te banch l sostitut Sorastant ne à dit che l vel aer na declarazion scrita, l la tolarà sù e l la manarà inant al Dirigent scolastich Roberto Ceccato e ai orghegn aministratives provinziai. 

L’à dit che duc portar inant soe posizion, l’é giust, el l’é chiò per scutar duc. Son n muie contenta – à dit amò De Pellegrini - prum percheche l’assessor provinzial a l’istruzion Mirko Bisesti à jà domanà schiarimenc al Goern tras la Conferenza de le Region e dapò percheche noscia istituzion chiò vejina l’à dit che la se cruziarà de se far portaousc con i dirigenc scolastics e con la Provinzia. Rengrazie duc chi che l’é chiò, chi che no à podù vegnir percheche i cognea jir a lurar: na gocia tel mar l’é na gocia tel mar ma chest l’é n auter pìcol varech e a picoi varesc se fasc i chilometres.«  (Monica Cigolla)