La Usc di Ladins

En vender ai 22 de jené i ombolc e i raprejentanc di 27 Comuns che fèsc pèrt de la valèda de la Veisc del Bim Adesc de Trent se à troà en videoconferenza e à lità duc a una l nef president. L’é Francesco Dellantonio »Franz Tasin« da Soraga, l tol l post de Armando Benedetti che é stat a cef del Consorzie de valèda per 15 egn.

Apede a Dellantonio l’é stat nominà i doi conseieres de valèda: Maria Bosin, ombolta de Pardac e Vittorio Stonfer, ombolt de Giovo che i vegnarà lité da l’assemblea generèla che vegn chiamèda ite ai 15 de firé ensema a la sezions de valèda de l’Adesc e del Nousc.

L Bim de l’Adesc l’é l Consorzie che gestesc i scioldi che rua ite dai sovracanones idroeletrics paé da la sozietèdes de produzion de energìa eletrica.

Dellantonio l’é stat per 8 egn conseier del Bim de l’Adesc raprejentant per Fascia. 

L’obietif maor del nef president l’é chel de ge dèr più sostegn ai Comuns che te chest moment rie de crisa economica se à vedù arbassèr i trasferimenc de la Provinzia. Apede a chest l vel seghitèr a didèr dò la sociazions de volontariat, en particolèr cheles de Protezion zivila, che l’é i pilèstres de noscia comunanzes.