La Usc di Ladins

Ai 8 de mé l’é la dì mondièla de la Crousc Checena e de la Mesa Luna Checena. Chest dì l’é stat cernù per recordèr l cedean de sie fondator, Henry Dunant, nasciù a Ginevra, ai 8 de mé del 1828. Dunant, imprenditor e benefator, l’é conscidrà l fondator de l’umanesim mondièl e l’à ciapà l Pest Nobel per la pèsc del 1901. Dò aer vedù l gran numer de ferii te la batalia de Solferino, l’à dezidù de meter sù n grop de volontères che posse portèr didament: l’é nasciù coscì la Crousc Checena.

Chest an chesta dì no pel esser na festa, ma cogn esser na ocajion per ge dir develpai a duc i operatores e volontères de la CRI per l gran sforz che i à fat, tant en pruma linia tel portèr aiut ai malé de Covid che te n grumon de autra ativitèdes, fates dò via la coltrines ma dutes autertant preziouses, desche ge portèr medejines o autra roba de prum besegn o compagnèr chi che no podea se la fèr cà enstesc.

Semper desponiboi e preziousc, da passa n an chisc volontères i se dèsc jù per duc zenza se fermèr mai, e apontin per chesta giornèda l’é stat cernù l’hashtag #inarrestabili, o per ingleis #TogetherWeAreUnstoppable.

Ence te Fascia nesc volontadives de la Crousc Checena i pel dir #NoSeFermonMai: l’ultim gran sforz portà inant e amò en cors l’é chel per poder tegnir avert n zenter de vazins anti Covid ence te val, a Sèn Jan.

En ocajion de chesta giornèda la raprejentanta di Volontères de la Crousc Checena del Grop de Vich Luciana Detomas ge à donà a l’Ombolt de Sèn Jan Giulio Florian la bandiera de la Crousc Checena, che ades la fèsc bela parbuda sun Cèsa de Comun per ge recordèr a duc de ge sporjer n pensier d recognoscenza a chisc Volontères. Ence l Comun General de Fascia, l Comun e Moena e l COmun de Soraga à metù fora la bandiera con su la crousc checena per palesèr sia vejinanza a chesta istituzion e l'orgolie de sie prejenza sun sie tegnir.  


 (Lucia Gross)