La Usc di Ladins

La é chiamèda ite ai 26 de mé en pruma convocazion e ai 27 e seconda convocazion, la radunanza generèla di sozi del Consorzie Eletrich de Poza, per aproèr l bilanz de l’an 2020 e litèr i componenc del CdA e del Colege sindacal. Te duc doi chisc organismes l’é trei componenc che fenesc fora sie mandat e che pel ence vegnir confermé e pel esser ence de etres candidac, che cognea se enscinuèr dant dai 18 de mé.

Dai 24 ai 26 de mé i sozi che vel dèr sia stima i pel jir te senta del Consorzie, te Strada de Pucia 3 a Poza, olache l’é a la leta l bilanz e i nominatives di candidac e l’é l’urna serèda, che vegnarà orida ai 26 o ai 27 dal raprejentant designà, l notèr Alessandro Franco.

L bilanz é a la leta per duc i sozi ence sul sit https://ce-pozza.e-bz.it/it olache ogneun pel jir te sia casela telematica per la fatures.

N bon bilanz a despet del malac

L bilanz – metù jù da la responsabola aministrativa Alessandra Bugarini - se à serà sù con n utol de 167.554 euro, mingol manco che l’an passà, chest en pèrt ajache mencia la faturazion del meis de dezember 2020, canche a cauja de la pandemia no l’é stat possibol peèr via con la sajon da d’invern, e en pèrt per steores che ge pervegnìa amò a l’an dant.

Ampò l’é stat n a an n muie bon, con na produzion propria del CEP che à passà via i 28.000 kWh l 12% più che l’an dant, ajache l’à pievet n muie.

La situazion de clausura e duta la limitazions per l coronavirus no à condizionà l lurier del CEP. »L’an passà d’aisciuda – disc l diretor Dino Detomas - aon cognù lasciar a ciasa valch dependent per segureza, ma i aea da far ferie e no aon mai metù nesciugn en cassa integrazion. Ence la domana de energia la é stata belebon normala. En conscidrazion de l’emergenza sanitara e ence economica che à portà la pandemia, apede a ge jir encontra a chi che stenta a paar la lum, coche fajon semper, aon dat ence n contribut per na ambulanza e aon pissà de ge dat al Banco Alimentare chel che de solit metaane tel pach da Nadal per i sozi.«

De più su La Usc stampèda de en vender ai 21 de mé del 2021  (Lucia Gross)