La Usc di Ladins

»Ve preon de no far batiman e ac, ma de aprijiar vigni scena e soraldut i momenc de acort per poder ge pissar sora dalvers a che che l Segnoredio l à fat per noi. Ve domanon valif de far acort canche sarà fenì«. Presciapech coscita tacaa via la raprejentazion de l’ultima setemana de Gejù portada dant da picoi e gregn de le curazie de Fascia, vidé da Suor Magdalena, en vender ai 27 de marz te Oratorie de Poza.

Ei, l era dassen de besegn de far acort co la ousc e col cher per se lasciar menar a Betania, tel Cenacol, sul Calvario e, tinultima, te chel vidor olache dut parea jir a fenir tel nia.

L é vera, più o manco duc sà che che l é sozedù te chela setemana, ma chesta outa la é stata contada a na vida desferenta: beleche dute le scene le vegnia contade tras ombrie tedò n gran linzel bianch, con gran cura per le mondure, i moc e le art che l é stat dorà. Apede le scene spilenade dai atores vegnia ence let toc de la Sacra Scritura e ciantà ciantie aldò de che che sozedea.

»L é stat desche prear duc ensema sun e entorn paladina«

L é vegnù fora ampò zeche da bel e rich de significat, segur no demò n moment che se à vardà su bolintiera. Trop l é ence chel che se à podù se portar a casa, che sie stat n personaje, na parola, n pensier personal vegnù fora te n moment de acort… dut robe che ne é vegnude endò tel ciaf endana la Setemana Sènta che sion do a passar fora, per la viver col Spirit de chi che sà che dut l é stat fat per noi e la vita à venciù per semper.

Podede lejer dut su La Usc dai 3 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Sara Pellegrin)