La Usc di Ladins

L’é l prum bilanz segnà dal temp del Covid chel serà sù ai 31 de dezember del 2020 da la S.I.T.C, Sozietà Increment Turistich Cianacei, con n utol smesà a confront del 2019: 3.188.954 euro, - 59,7%.

No l scon i cruzies e l despiajer l president de la sozietà Daniele Dezulian che en mèrtesc ai 12 de messèl à chiamà ite, ensema al diretor Francesco Zanna, na conferenza stampa per prejentèr dac e relazion. »L’an 2020 é stat segnà da n straoujiment di scenaries economics che à metù sotessora a na vida grieva l panoram economich che śira entorn a dut l ‘sistem da mont’ nazionèl. Te chesta situazion mai veduda dant – à dit l president Dezulian - la SITC se à desmostrà operativa e propositiva a livel local ma ence a livel nazionèl. Se à lurà duc ensema per ruèr a l’aproazion di protocoi da man del Goern e del CTS (Comitat Tecnich Scientifich) e che aessa consentì de salvèr amancol en pèrt la sajon da d’invern, che dapò no é mai tachèda ite, per 5 outes se pissèa de poder verjer i impianc enveze a la fin dut l setor é restà cet.

E se per chel che vèrda l bilanz 2020 l’é mencià demò pec meisc da d’invern, i conc piores se i vedarà tel bilanz de l’an 2021 – à dit Dezulian – con i vadagnes de la sajon da d’invern a zero e dependenc che à cognù vegnir metui en cassa integrazion. Na situazion mai abuda te 74 egn de storia de la SITC.«

De più su La Usc stampèda de vender ai 16 de messèl.  (Monica Cigolla)