I é zirca 1200 i bec, da la pruma clas de la populères a la quinta clas de la scola auta, che en lunesc ai 13 de setember à tacà chest nef an de scola te Fascia.
L maor numer i é a la populères, 445 en dut e de chisc 136 te la populères de Poza a Sèn Jan, 134 a Moena, 130 a Cianacei e demò 45 en dut a Vich.
Apontin Vich l é dò a padir più che ogne auter paisc l smendrament demografich, defat chest an te la pruma clas l é demò 4 bec. L maor numer de picoi de pruma i é a Sèn Jan, tel frabicat de la mesènes, olache jai doi egn l é stat tramudà la populères de Poza, ajache la veia scola dedichèda a don Lodovico Gross era doventèda oramai massa picola. Ampò ence a Poza l é stat n smendrament e al post de la 3 classes de 5^ coi 29 bec rué ite l é stat fat demò doi prumes. Chiò ence per la seconda, con 22 bec, l é formalmenter demò una clas, ampò l é stat l met de creèr doi gropes che pel lurèr despartii per aer più lèrga ence per la maor segureza per l Covid.
A Cianacei en pruma clas l é ruà ite 24 picioi, e 20 enveze i é a Moena. Chiò l é ence 4 picioi da Soraga che i à cernù duc de jir en ju, nesciun bez de pruma da Soraga l é stat manà sa Vich, olache coche aon jà dit l é demò 4 scolees e chesta segur no l é na situazion otimala a livel didatich e cognarà vegnir valutà la dinamiches e la soluzions possiboles.
Per chel che vèrda la scola mesènes en dut i scric ite i é 316: a Sèn Jan l é beleche 150 scolees, 88 i é a Ciampedel e 80 a Moena.
Numeres gregn ence a la scola auta, con 434 studenc en dut.
De più su La Usc stampèda de vender ai 17 de setember. (Lucia Gross)
L é tacà la lezions per zirca 1200 bec e joegn
La Scola Ladina de Fascia à peà via l an de scola con l nef Sorastant Federico Corradini. N scomenz zenza problemes ence per l control del green pass, spetan la piataforma del goern.
Galaria retrac
View the embedded image gallery online at:
https://www.lausc.it/valedes-ladines/fascia/17094-l-e-taca-la-lezions-per-zirca-1200-bec-e-joegn#sigProId5f4ae6ff4e
https://www.lausc.it/valedes-ladines/fascia/17094-l-e-taca-la-lezions-per-zirca-1200-bec-e-joegn#sigProId5f4ae6ff4e