La Usc di Ladins

L frabicat de la scoles populères de Poza doventarà »Ciasa de la Musega de Fascia«. L lo à fat a saer l ombolt de Sèn Jan Giulio Florian enstadì, en ocajion de l’inaugurazion de la neva senta del Cor Valfassa che à troà lèrga belapontin tel frabicat de Poza, olache l era la palestra.

»L Cor Valfassa l é la pruma sociazion che va ite – à dit l ombolt Florian. Volon che dovente na sort de Kulturhaus olache troarà post apede al Cor Valfassa ence i autres cores, la Musega e la scola de musega ‘Il Pentagramma’ che ades te scola mesana la é strenta e l’à debesegn de post.

Aon n projet per smaorar l frabicat da la man del piazal dai auti e far na sort de auditorium olache le sociazion pel far si conzerc e se pel dapò durar ence per feste e sagre de la comunanza. A chesta vida podon tor demez l tendon te piaz del Malgher.«

Te chest moment tel frabicat l é ite i bec e la scolina che i se tramudarà endò a Sèn Jan apenamai che sarà struté su i lurieres de renovament e smaorament, se perveit per chest’aisciuda che vegn.

En sabeda ai 2 de otober l Cor Valfassa à endrezà n moment de inaugurazion ofizièla de la neva senta con n picol conzert e la benediscion da man de don Andrea Malfatti.

Ti locai sot tera l é stat fat fora n picol bar con na cojina e la sala proes che é stata insonorisèda e fornida su con retrac e recognoscimenc che conta de la storia del cor.

 (Monica Cigolla)