La Usc di Ladins

L Grop FAI de la valèdes de Fascia e Fiem endreza ence chest an la Giornèda FAI da d’uton per jir a descorir l melaur artistich e culturèl de nosc teritorie, en program en domenia ai 17 de otober. Chest’outa se jirà a cognoscer i ciantons più sconec de la Val de Sora, Lorenz, Vera e Penia. 

La giornèda é stata spartida te doi pèrts, inantmesdì e domesdì.

Se se troa te Piaz de Penia olache da les 10.00 ponta via l prum grop e da les 11.00 l secondo. Se va su fin sa Lorenz, Vera e Insom, la frazions più autes del Trentin, loghèdes ju al soladif tedant l Gran Vernel. Se vegnarà compagné dai volontères del grop CAI SAT Auta Fascia che metarà dant ence vèlch curiosità sul ambient e la erbes. De Insom, che à ciapà fech endèna la pruma vera e no l é più stat fat su, l é da poder veder amò i resć de la cèses e i fondamenc. Se podarà jir a veder ence la picola gejia de la Madona del Aiut sal Vera con sie picol ciampanil de legn.

Domesdì enveze se se tramudarà a veder la frazion de Penia e la gejia di Sènc Roch e Bastian. L prum grop ponta via da les 14.30 e l secondo da les 15.30.

Se jirà a veder Cèsa Dovolavila, un di ultimes ejempies de cèses de mur desche n’outa, olache l é ence pitures a fresch e raprejentazions religiouses. L capogrop del FAI Gabriele Mambo Valentini contarà e mosciarà ence vèlch retrat de la pruma vera.

Dapò se jirà a veder la gejia di Sènc Roch e Bastian del XVI secol con sie ciampanil a cigola. La gejia, che per solit é serèda, la vegnarà averta apontin per chesta ocajion.

Per tor pèrt ge vel se enscinuèr sul sito www.giornatefai.it, vegn domanà n contribut de 3 euro. Vegn conseià de se regolèr aldò e de se tor do la marena te prossach. Se fossa catitemp la atività vegn anulèda.