La Usc di Ladins

La cianties di joegn de ‘Cianton da Marevea’ e la prejenza de na lingia de studenc che portèa dant desvalives projec didatics ge à fat entener sobito a la jent ruèda en domenia tel teater del Oratorie de Moena che l’Union di Ladins de Fascia te sia Festa del Rengraziament volea empeèr la lumes su na scola viva e ativa, la tolan ite a na vida concreta e no demò con la paroles. 

Paroles che ben segur no é mencèdes, ma che se à enterzà a na vida enteressanta e nia pesoca tel domesdì endrezà da la sociazion ladina per ge dir develpai ai Sorastanc, e con ic a duta la persones che à volù, defenet, manà inant, fat crescer e valorisà la Scola Ladina de Fascia.

Prejenté a na vida feruscola da la vizepresidenta Nicoletta Riz, i intervenc se à dejout pean via da la vizeombolta de Moena Cristina Donei, che à rejonà no demò da patrona de cèsa ma ence da dozenta, sotrissan l’emportanza de la formazion per i studenc.

L president de l’Union Fernando Brunel à recordà l valor de chesta Festa che la sociazion met a jir da passa 30 egn, ogne an te n paisc desferent de Fascia e sun n tem de la vita culturèla, economica e sozièla de noscia val, chest an apontin la scola. L à dapò recordà la batalies de l’Union e di militanc per l ensegnament del lengaz e de la cultura ladina.

L é entervegnù Roland Verra, stat per passa 20 egn Intendent de la Scoles Ladines de la provinzia de Busan, l procurador del Comun general Bepe Detomas, la Intendenta de la Scoles ladines del Sudtirol Edith Ploner e dapò la parola é jita ai Sorastanc Federico Corradini, Fortunato Bernard e Mirella Florian. A duc trei ge é dapò president Fernando Brunel e l president onorarie Antone Pollam ge à sport l rengraziament de l’Union di Ladins de Fascia.

De più su La Usc stampèda de vender ai 15 de otober.  (Lucia Gross)