La Usc di Ladins

L’é l prum dessegn de lege che l Comun general de Fascia ge porta dant a la Jonta de la Provinzia de Trent e sia valuta no vegn demò dal strument metù en esser ma ence dal contegnù. Se trata de la proponeta de ge assegnèr la quota del 10% de la steora de sojornanza regoeta te val al Comun general de Fascia per l finanziament e l sostegn de l’ativitèdes culturèles, per l recuperament di elemenc identitères e i projec de enteress generèl che califichea l teritorie e l’identità de la comunità ladina e che caraterisea la perferida turistica.

La mozion con la proponeta de lege, portèda dant dal secretèr e capogrop de la Neva UAL Francesco Gabrielli, é stata sotescrita da duc trei i capigrop e aproèda duc a una te Consei general chiamà ite en mercol ai 13 de otober. »Na scomenzadiva no demò de duc i trei gropes del Consei general ma ence del Consei di ombolc e de l’Apt de Fascia - à sotlineà Gabrielli – donca na scomenzadiva de duta la val.« 
»Con chest dessegn de lege Fascia domana de poder aer n ruol emportant tel setor turistich caraterisà da l’identità ladina – à dit l procurador Giuseppe Detomas – ma cognon vardar che i ne dae ence le ressorse per l far. L é n strument de prescion politica envers la Provinzia che vegn ence dai ombolc e dal conseier provinzial Luca Guglielmi che à fat a saer de aer prejentà te Consei provinzièl ai 8 de otober na proponeta valiva, l ddl nr 118/XVI. L ejit de chesta scomenzadiva darà la mesura de cotant che vegn tegnù en conscidrazion Fascia e l conseier ladin.«

L Consei general à aproà ence n contribut straordenèr ai volontadives che à endrezà la vazinazions .

De più su La Usc stampèda de vender ai 22 de otober.


 (Monica Cigolla)