La Usc di Ladins

L an 2021, desche l 2020, à metù sotessora patoch l contest economich che roda dintorn a dut l ‘sistem da mont’ nazional. Te la sajon da d’invern 2020/21 Fascia no à abù praticamenter nesciuna prejenza turistica, tel comples l setor à perdù 1.863.039 prejenzes respet a la sajon da inant, che vel dir l 98,68%.

Te chest chèder à cognù se la fèr ca ence la sozietèdes portamont. L president de la SITC Daniele Dezulian, te na conferenza stampa chiamèda ite en lunesc ai 16 de mé, ensema al diretor Francesco Zanna, l à metù dant i dac del bilanz serà su a la fin de dezember del 2021, aproà dai sozi te la radunanza dai 10 de mé.

»La mencianza de la sajon da d’invern à pesà sul bilanz 2021 con n smendrament de beleche 20 milions de encasc, per chel che vèrda i meisc da jené a oril – à dit l president Dezulian – per fortuna che la sozietèdes de impianc portamont à ciapà i restores: la SITC à podù fèr cont sun 13.305.854 euro. Se no se met en cont i restores, i encasc da la vendites e da la prestazions del 2021 é stac demò de 9.177.132 soraldut de gra al istà e al meis de dezember 2021, en confront ai 21.406.466 del 2020 e ai 30.401.675 del 2019.«

Enceben la dificoltèdes de n an segnà da la pandemia, la SITC sera su l bilanz 2021 con n utol de 5.331.225 euro. L istà defat l é jit ben, te val l é ruà n grum de foresć.

De più su La Usc stampèda de vender ai 20 de mé.  (Monica Cigolla)