La Usc di Ladins

La sajon de la roda se viventea de pien. Do la tapa del Giro d’Italia ai 28 de mé, de la Marcialonga Cycling ai 29 de mé, del Sellaronda Bike Day ai 11 de jugn (che sarà amò ai 17 de setember) e la Hero Dolomites ai 18 de jugn, rua te Fascia la Met Enduro World Series: apuntament en sabeda e en domenia, ai 25 e 26 de jugn.

»Nosc obietif l é chel de fèr a na vida che l event de Enduro World Series de Fascia reste anter i più aprijié dai rider e coscita ence dal publich che ge stèsc do« à dit William Basilico president del Comitat de endrez de la garejèda.

Duta Fascia e l paisc de Cianacei é vertesc a tor dant no demò la squadres e i espositores, ma ence endodanef l publich che pel tor pèrt a la competizions.

I rider de la EWS e de la EWS 100 se darà ju sun n percors de 42 chilometers e 2.800 metres de dislivel per i profescionisć e de 36 chilometres e 2.600 metres de dislivel per i amatores su per l Pordoi e l Sela, jan do i percorsc de roda da mont. En dut i concorenc scric ite é 700 da 37 nazions de dut l mond, anter Europa, Stac Unii, Asia e Oceania.

Chest an l event à ciapà l recognosciment de Eco-Evenc Trentin, n marchie che ciapa duta la manifestazions promotores de azions de sostegnibilità ambientèla. Na atenzion particolèra al tem de l’èga ajache l event vel sostegnir la fontènes de èga naturèla e publica travers na mapa online realisèda con l didament de la firma de Cianacei Cedea, l vel tor demez la doura de la plastica dai restores per i concorenc e l endreza l marindel coi prodoc del post. »L’idea de poder smendrèr l impat lascià sul ambient da nesc evenc l é zeche che ne dèsc amò più gaissa e l é ence na vida per ge portèr respet a nosc teritorie olache podon endrezèr chesta sort de manifestazions che doventa an do an semper più emportantes ence a livel mediatich.«

 (MCI)