La Usc di Ladins

Se à serà su en jebia ai 25 de aost col spetacol final la scomenzadiva a Moena de Istà Algegra endrezada da la Coprativa soziala Spazio Tempo vidada dal president Biju Vadagnini.

»Siede duc envié a nosc maridoz che sarà PER-FET-TO« dijea l placat. E de envié se n à prejentà dalbon n muie, passa 600 jent à empienì l teater de Navalge curiousa de veder che che aessa metù dant chest’outa l feruscol grop de bec e joenec che via per dut istà à tout part a le atività de Istà Algegra.

Chest an i tosac scric ite é stac 190 vidé da 12 animatores col didament de 10 joenec de le scole aute. L era ence doi bec con pedimenc vardé via da Jessica e Davide. Ai animatores va segur n fort develpai per aer endrezà ogne sort de jech, raida, escurscion, per aer compagnà i tosac e le tosate te sia crescimonia e sia sozialisazion. Prum de dut a Biju, anema e ciau de Istà Algegra e con el a Francesco, Noemi, Fabiana, Chiara, Ambra, Andrea, Nadine, Gaia, Beatrice, Martino, Caterina e Valentina.

De più su La Usc stampèda de vender ai 2 de setember.  (Monica Cigolla)