La Usc di Ladins

Ai 25 de setember i sentadins de la Tèlia é chiamé a litèr per l nef Goern. Enceben che chest’outa se lite manco parlamentères, ajache va en doura la lege per l smendrament del numer (donca 400 a la Cambra e 200 al Senat, enveze che 945 en dut desche ades) se litarà amò con l Rosatellum, la medema lege durèda ence per la politiches del 2018. L sistem l é mescedà: un terz di seggi presciapech vegn assegné te coleges uninominai e i etres doi terc te coleges plurinominai. Tel Trentin-Sudtirol però l é na ecezion ajache no vegn lità senatores al proporzional. Con la reforma defat vegnarà lità 13 parlamentares enveze che 17, 6 al Senat e 7 a la Cambra (3 al proporzional e 4 col maoritèr).

I cadidac per l Senat

Ponton demez dal Senat. I sentadins del Trentin podarà cerner 3 senatores duc te coleges uninominai (Trent, Perjen e Roveredo). Te nosc teritorie la coalizion de zenter-cencia e l terz polo se à prejentà ensema tel grop Alleanza democratica per l’autonomia. L candidat che ciapa na stima più che i etres vegn lità.

Fascia fèsc pèrt del colege de Perjen olache se à prejentà chisc candidac:
per l PATT e Progetto Trentino: Roberta Bergamo
per Alleanza democratica per l’autonomia: Michele Sartori
per la coalizion de zenter-dreta (Fratelli d’Italia, Lega e Forza Italia): Elena Testor
per l Movimento 5 Stelle: Rosa Michela Rizzi
per Italia Sovrana e Popolare: Roberto Cappelletti
per Unione Popolare: Giuliano Pantano.

De più su La Usc stampèda de vender ai 16 de setember.