La Usc di Ladins

En sabeda ai 15 de otober l é stat endrezà l event più aut de degustazion enogastronomica. L più aut percheche l Refuge Maria sun Sas Pordoi l é a 2950 metres sul mèr, ma ence percheche l livel de calità di prodoc che vegn sporc te chest apuntament l é dassen ‘top’ e l panoram che se pel se goder da la »Terrazza delle Dolomiti« rec i più auc confronc del mond.

Vint cèvenes à portà fin sun Sas Pordoi la selezion de si vins miores, 19 da noscia region, spartides a na vida equilibrèda anter la provinzies de Trent e de Busan e una, descheche l é stat fat ti ultimes egn, dedichèda a la produzion enologica de n’autra region de la Tèlia: chest’outa l Piemont, con si nebbiolo, barbera e etres, sun duc ben segur l barolo.

Per compagnèr descheche carenea la degustazion se à metù a la leta desche semper ence i Sommelier de Fascia e Fiem e a livel gastronomich l é stat la colaborazion de la Sociazion di Cheghes de Fascia, che à pissà e enjignà l piat spezièl »Top Wine« e col didament di studenc del zenter de formazion profescionèla Enaip de Tieser i à endrezà e servì ence na bona selezion de cerces »finger food«, de gra a la cordanza con desvaliva firmes de calità de nosc raion.

De più su La Usc stampèda de vender ai 21 de otober.  (Lucia Gross)