La lèstes de Franz Dantone Pascalin

Data

19 de jugn 2023

Galaria retrac

Grandeza scritura

Social

927 l é l numer de lèstes de Franz Dantone Pascalin che l joen Lorenzo Dezulian à rità da sie giaf Franco del Garber e che bele prest vegnarà restaurèdes.

Vegn contà che i ritadins del fotograf Dantone era do a menèr l archif fotografich te Veisc, ma enlouta, no se sà se per coinzidenza, fortuna o gran anteveder, Francesco del Garber se l fèsc dèr.

En domenia sera ai 11 de jugn te Istitut Cultural Ladin Majon di Fascegn l é stat portà dant n nef projet, en cordanza con la familia del Garber, de restaure conservatif de la lèstes de Pascalin. »L projet de restaure - à spiegà Lorenzo Dezulian - perveit de meter a salvament l archif entriech e per chest aon tout pèrt a n bando de la Fondazion Caritro che speron vegne tout su. N restaurador à da netèr la lèstes e encolèr l’emulscion che col temp la é do che la se destaca. I originèi ge volarà i tegnir su te armeres che tegn fora l fech e con tempram e tumech controlé. Do les aer digitalisèdes e cataloghèdes, l fin ultim de chest projet podessa doventèr na publicazion«.

La lèstes, che tol ju paesajes, enaudazions e persones, les é per la maor pèrt inedites e les podessa moscèr tropa documentazion storica no amò cognosciuda. L patrimonie fotografich l restarà de proprietà de la familia; chi che podessa aer material de desvaliva sort su Franz Dantone Pascalin é envià a tor contat con Lorenzo Dezulian.

De più sun chest projet fat cognoscer te ICL su La Usc de papier de en vender ai 16 de jugn del 2023.

(NR)