La Usc di Ladins

L Comun General de Fascia fèsc fora l’ultima de la ex casermes austriaches a Sèn Jan, doventèdes colonies alpines milaneises: la Vittorio Veneto. L lo à fat a saer l conseier de procura ai lurieres publics Carlo Ganz endèna l ultim Consei, stat en lunesc ai 31 de messèl.

Per tor dant chest intervent l é stat aproà n mudament al bilanz de previjion 2023-2025 de 921.050 euro che porta l total de la entrèdes e de la speises da 15.033.948 euro a 15.954.998 euro. 

L Consei de procura à dezidù de durèr l arvanz de aministrazion e de meter a bilanz 711.638 euro per ge fèr front a la neva speises. Anter i maores investiments l é stat metù belapontin 220.000 euro per i cosć per i projec per fèr fora la ex caserma Vittorio Veneto e 280.000 euro per la manutenzion straordenèra del frabicat senta del Comun General. »Chesta strutura taca a mosciar i segnes del temp – à dit l architet Ganz – l é de besegn soraldut de mudar fora i seramenc e meter a post l cuert.«

Per chel che vèrda l intervent su la ex caserma, Ganz à fat a saer che zacan l’aministrazion é stata bona de troèr na strèda per suplir a la mencianza de na fegura responsabola te ofize tecnich.

De più su La Usc stampèda de vender ai 11 de aost.  (Monica Cigolla)