La Usc di Ladins

Da temp se rejona de l’emportanza de n pat olache scola e familia i sie aleé tel chierir de responer a la endesfides educativer e formatives de bec e joegn. Sun chest troi se à dat ju con empegn e determinazion n grop de persones che fèsc pèrt de la Consulta di genitores de la Scola Ladina de Fascia. De chest projet, che à inom »Scola Ladina 4.0. Fajon su ensema n model sostegnibol e de suzes« aon rejonà con Maria Francesca Zulian, componenta de la Consulta di genitores che con Chiara Pederiva l’à tirà i fii de dut l projet.

Che él avisa la Consulta di genitores e chi él laite?
Maria Francesca Zulian La Consulta la tol ite i raprejentanc di genitores de duta la scoles de Fascia, l é ite passa 100 genitores e l obietif l é chel de colaborèr con la Scola e coi professores per l ben di scolees e studenc, nesc fies.  

E ades aede pissà a na bela scomenzadiva...
L é n projet tacà via per l invern, canche l Sorastant professor Corradini l ne à portà dant la neves de la Scola Ladina, e con gaissa l ne à dit che l era neves ence leèdes al PNRR (Piano Nazionale di Ripresa e Resilienza) che pea via dal decret del Minister de l’Istruzion che à per titol Piano scuola 4.0. Per nos l era emportant saer che la Scola Ladina portàrà inant doi projec, un che revèrda l’inovazion digitala e un su la disperscion scolastica, l orientament e i problemes che i studenc pel aer tel percors de scola.
Da chela sera se à metù ensema n picol grop de na dejina de genitores dalbon engaissé, motivé da chisc doi temes per didèr i bec tant sui digital che per chi che à problemes spezifics, e aon capì sobito che cognon se verjer a la comunanza.

Volon capir delvers i besegnes e la idees di genitores per no ge portèr dant na roba jà determinèda, ma la pissèr duc ensema. Per chest endrezon na pruma scontrèda per capir coluns che l é i argomenc che i volessa che vegne traté e l é emportant che i genitores tole pèrt.
La scontrèda sarà en lunesc ai 9 de otober da les 20.15 te Sorastanza de la Scola ladina a Sèn Jan.

De più su La Usc stampèda de vender ai 6 de otober.




 (Lucia Gross)