La Usc di Ladins

»L color de l’art tei cadres e le stagion de Igi Pitor« l é l titol de la mostra de chèdres del pitor da Soraga Luigi Pederiva che l Comun ensema a la galaria d’èrt TanArt de Sergio Rossi à metù fora te La Gran Ciasa. L’emprometuda de portèr la mostra te paisc de naa de Igi Pitor era stata touta su dal ombolt Valerio Pederiva e da Sergio Rossi l an passà canche belapontin Rossi aea endrezà na mostra te sia galaria a Cianacei. L é passà 10 egn da canche Igi ne à lascià, l era l 2013, l aea 98 egn, e l era giust che sie paisc ge dediche na mostra per l recordèr e per valorisèr l melaur artistich che l ne à lascià. N muie de jent à tout pèrt a l’inaugurazion en sabeda ai 11 de november domesdì olache l ombolt Pederiva à sotlineà che la mostra de Igi Pitor vel esser n recort per el ma ence de duc i etres artisć de Soraga che se à dat ju per l’èrt.

Ge vardèr ai chèdres de Igi Pitor l é desche esser tedant na fenestra averta sun pre, sun cèses, sun ciantons, sun momenc e particolères, e i eies se ferma en contemplazion e la ment viaja, la viaja tel temp e ti recorc, te la man zevila e la veièda sèvia de Igi Pitor.

Se pel veder la mostra te La Gran Ciasa a Soraga fin ai 10 de dezember, dal mercol a la domenia da les 16:00 a les 20:00, olache se pel ence comprèr l bel catalogh dat fora l an passà.

De più su La Usc stampèda de en vender ai 17 de november del 2023


 (Monica Cigolla)