La Usc di Ladins

L P.R.G., l Pian Regolator General, l é n strument de gran emportanza per la pianificazion urbanistica de n Comun. L vegn metù ju travers n iter lonch e detaà e sia adozion la va a regolèr duta l’atività edificatoria sul tegnir comunal. Per chest e soraldut te Comuns picoi desche i nesc olache pel jir via ence 20 egn inant che vegne tout su na neva varianta al PRG, l é emportant che sia pianificazion vegne pissèda e lurèda fora delvers e soraldut che i sentadins vegne metui en consaputa e i posse tor pèrt.
N conzet che la lista de mendranza de Comun de Soraga L Sveiarin à volù sotrissèr a na vida chièra tras n lurier puntual de osservazions che l’à volù condivider coi sentadins, percheche ence ic posse dir la sia dant del termin stabelì ai 20 de jené. Te na scontrèda publica chiamèda ite en lunesc ai 15 de jené te sala de Consei de Comun, tedant a passa 80 persones, l capogrop Fernando Brunel ensema ai conseieres Michele Decrestina e Martina Pederiva à spiegà dantfora dut l iter de la varianta al PRG, che é tacà ite ai 17 de dezember del 2021 con l avis preliminèr de scomenz del prozediment.
N iter – à dit i conseieres de mendranza – che ne à lascià belebon dubiousc: jà dal avis preliminar olache l’Aministrazion tegn averc duc i ujes zenza crear n cader chiar per si sentadins, al fat che no ge é stat responet a le domane e le osservazion de la jent, che n muie de domane sie ruade ite diretamenter dai aministradores o parenc e che demò do aer prejentà l Pian al grop de mendranza se aesse domanà le declarazion de compatiboltà/encompatiboltà.

De più su La Usc stampèda de en vender ai 19 de jené.  (Monica Cigolla)