La Usc di Ladins

Descheche ve aane contà acà dotrei setemènes, te la Biblioteches de Fascia e Fiem vegn metù fora a roda la mostra ‘Nati per leggere’, na scomenzadiva de la Biblioteches del Trentin per arvejinèr i picioi e la picioles dai 0 ai 6 egn a la letura. La mostra l é na gran lingia de passa 100 libres con dessegnes chierii fora per sia calità e che, aldò di esperc del Osservatorie, i deida l bez te sie crescer. I é spartii te 10 sezions desvalives.

Dai 26 de mèrz ai 7 de oril la mostra la é stata metuda fora te biblioteca de Sèn Jan, dapodò dai 9 ai 19 de oril a Moena e dai 21 ai 30 de mé a Cianacei. Ite per mez la é stata a Tieser, Pardac e ades, fin ai 14 de jugn, la sarà fora Ciavaleis. Co éla jita te noscia Biblioteches?

Te Biblioteca de Cianacei
L bibliotecarie de Cianacei ne à dit: »Chiò l é vegnù demò n par de persone, proprio pece a vardèr la mostra, ma ampò son content de chi cater o cinch che i é vegnui aposta a la veder. Min despièsc che no abie tout su chesta oportunità più jent.

Se pel lejer dut, con l bolanz ence de la Biblioteches de Sèn jan e Moena, su La Usc nr 21 dai 6 de jugn: l sfoi stampà l é ence te la boteighes de sfoes.


 (Nicoletta Riz)