La Usc di Ladins

Ta Penìa l é tradizion che l Grop de la Mèscres de Dèlba e Penìa porte dant ogne an da Carnascèr doi mascherèdes. Chest an la pruma vegn spilenèda proprio doman da sera, en Sèn Bastian, e i atores del Grop à dezidù de n portèr dant una neva e noventa. L titol l é »L pat di doi amisc« e la é stata scrita da Claus Soraperra de la Zoch.

»Chesta neva mascherèda la é nasciuda percheche mi père per egn a do a do, canche jie ju a zipièr faceres, me contèa la conties da n’outa – ne à dit Claus Soraperra - cheles de la tradizion, patofies leèdes al pat col diaol, ai pitores a la foresta… Mie père l les aea sentudes contèr da sie bèrba Ferdinando e defat chesta mascherèda ge la é dedichèda a el, Ferdinando Iori de Mita, nasciù del 1921.
No l é sorì scriver na mascherèda, é fat fadia a la meter ensema percheche la é scrita pissan a chi da Penìa, a coche i spilenea ic con sia paladina. Son stat content percheche ence la mascherèdes l é n strument per ge dèr forza al lengaz, l é vegnù fora n bel lengaz, na mascherèda de la tradizion.«

Ve envion duc a jir ta Penìa, doman, sabeda ai 20 de jené da les 20:30 te la veia scoles per descorir la neva mascherèda de Claus Soraperra de la Zoch e se goder coi atores del Grop de la Mèscres de Dèlba e Penìa. En sabeda ai 3 de firé l Grop met dant enveze la mascherèda de Fabio de la Menina dal titol »N forest ta Penìa« per l recordèr a 20 egn da sia mort. I etres apuntamenc é dapò en jebia grassa ai 8 de firé e en mèrtesc de Carnascèr ai 13 de firé.

De più su la neva mascherèda de Claus Soraperra su La Usc stampèda de en vender ai 19 de jené del 2024


 (Monica Cigolla)