La Usc di Ladins

Da chest istà no sarà più demò l cognosciù e aprijià Istagran, endrezà da la Coprativa sozièla Inout: per la scomenzadives da d'istà per si fies dai 6 ai 12 egn, i sentadins de Sèn Jan i podarà valutèr ence la proponetes de autra realtèdes de profescionalità educativa e didatica recognosciuda e segura.

L é chesta la pruma neva che la assessores del Comun de Sèn Jan Mirella Florian e Lucia Dellagiacoma, ensema a la referentes del Comun Paola Martini e Cristina Deluca, che à dat duta la informazions che servia, ge à prejentà ai 25 de mèrz ai genitores sentadins del Comun, rué en gran numer e con na gran prejenza de pères, bon segn de coinvolgiment a partezipazion a la costions che revèrda i fies.

L'autra neva revèrda enveze i contribuc che l medemo Comun met a la leta per chierir de sostegnir la families che scrif ite i fies a chesta scomenzadives, che l é na ocajion bela per i bec e n aiut gran per i genitores, ma les à n cost belebon aut che desche duta la robes l seghita a crescer.
L Comun de Sèn Jan, che fin al an passà ge dajea l contribut diretamenter a la Coprativa Inout (l an passà per Istagran 550 euro a bez) a na vida che i posse ge domanèr a la families demò mesa la speisa, l à dezidù per maor trasperenza che da chest an l contribut ge vegnarà dat diretamenter a la families che mana i fies a la ativitèdes da d'istà.

I genitores é donca envié a vardèr la perferides e cerner che che i vel per si fies, i scriver ite coche perveit vigni sociazion o coprativa e dapò domanèr l contribut al Comun, aldò de la modalità e con la documentazion perveduda.

Per aer maor informazions se pel vardèr sul sito del Comun de Sèn Jan sot 'Novità' o domanèr diretamenter te Cèsa de Comun per i contribuc e ai referenc de la sociazions per info sun oraries e programes.

Podede lejer dut su La Usc dai 3 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)