La Usc di Ladins

Acà 20 egn, ai 12 de oril del 2005, Danilo Dezulian dal Garber lascèa chest mond, sia familia, sia comunanza da Pera, sia tera de Fascia e la Ladinia.

Danilo dal Garber l é stat un di gregn militanc ladins, protagonist de chela emportanta sajon storica che ti egn ’70 ge à dat ousc e forza a la revendicazions de noscia val e ge à permetù de arjonjer obietives desche l Comprenjorie Ladin despartì da chel de Fiem, l Istitut Cultural Ladin e etres traverc.

L é stat president de l’Union di Ladins de Fascia dal 1976 per passa 10 egn e dapò fin en ultima president onorarie, conseier e tel ultim temp de sia vita, fin a sia departida, ence president del Istitut Ladin. L é stat ence aministrador, ombolt del Comun de Poza e assessor del Comprenjorie Ladin e te chesta encèria, amò ti prumes egn ’80, l à metù su l boletin col inom »Comun General de Fascia«.

Per duta chesta rejons l’Union di Ladins e l Comun General de Fascia vel l recordèr en ocajion del venteisem cedean da sia departida.

Apontin ai 12 de oril da les 4 domesdì Danilo Dezulian dal Garber vegnarà recordà con doi momenc de valuta: l Comun General ge entitolarà ofizialmenter la sala grana de la Ciasa de la Moniaria per recordèr l militant e aministrador che ge à avert la strèda al Comun General de Fascia; l’Union di Ladins portarà dant l liber dal titol »Tal cher de mie cher« che met al luster, apede a la fegura de leader storich, ence chela de poet sensibol, che anter sia ultima paroles l à scrit: »Recordame valch outa, no par chel che é fat de bel o de burt, o che no é fat, ma recordame demò desché un de voi, che ge à volù n gran ben a soa jent e a soa tera...«  (LG)