La Usc di Ladins

La a é da Juan, ma per mère mesa da Poza, la neva Soreghina de la Marcialonga. L é Pamela Croce e la é stata encoronèda en sabeda sera te na bela zerimonia a La Gran Ciasa a Soraga. La é stata cernuda anter sie candidates da na juria califichèda de doudesc persones, che é states fin tinultima en dificoltà per la scelta ajache duta cantes se à prejentà n muie ben. Les é states valutèdes per sia sportività, atività tel sozièl, avertura culturèla, leam col teritorie, la cognoscenza di lengac e ence la beleza, ence se la passa en secondo pian te chest contest.

Pamela Croce l é stat la più litèda, do n ex equo e la dezijion del president Angelo Corradini che à saludà la juria e l publich, apede che la sie candidates. Sun paladina ence l vize scarie Massimiliano Gabrielli, con l’encèria de encoronèr a inom de la Magnifica Comunità e l ombolt de Soraga Valerio Pederiva, che à portà l salut de l’aministrazion.

Pamela Croce, da Juan ma ades la stèsc a Ciavaleis, la peissa che ogneun cognessa fèr volontariat percheche ‘dut pèrt dal cher’ e se fèsc per i etres zenza domanèr nia de contra. A convenjer la juria ence la scheda de Pamela Croce. Laureèda en scienzes motories, ge pièsc la letura, i viajes e i sport (atletica, saut, jir coi feres, nodèr e c.i.). L’à stat te la California desche ‘tousa a la pèr’ e la fèsc volontariat per Marcialonga. Ge pièsc de più ge ensegnèr sport ai bec percheche per ic l é n jech e i dèsc n muie de sodesfazions. Per Pamela fèr sport no l é n sacrifizie, ma n stil de vita e n muie de picoi momenc de legreza.

De più su La Usc stampèda de en jebia ai 14 de aost del 2025