L organism che cogn dezider la politica linguistica per l stravardament e la valorisazion del ladin te Fascia l é stat nominà dal Consei de Procura ai 26 de aost e chiamà ite per i 22 de setember.
En lunesc ai 22 de setember vegn chiamà ite la neva Consulta ladina, per la pruma outa do la litazions del meis de mé passà. Perveduda dal articol 26 de la Lege Provinzièla nr 6 del 2008 su la mendranzes linguistiches, la Consulta ladina é nominèda dal Comun General de Fascia e l’à regnèda per l temp del mandat aministratif.
A la Consulta ladina ge pervegn de vardèr i besegnes de la comunanza per chel che vèrda la promozion del lengaz, tor dant la ativitèdes en esser per chest fin e valutèr sia percacenza, fèr fora la prioritèdes e dachelanvia lurèr fora la linies de politica linguistica da portèr inant per stravardèr e valorisèr l lengaz ladin.
I componenc de chesta neva Consulta é stac nominé dal Consei de
Procura ai 26 de aost. President l é l Procurador Edoardo Felicetti e amò per l Comun General de Fascia l é ite l Conseier de Procura con competenza su la cultura ladina Bernardino Chiocchetti e la funzionaria di Servijes Linguistics Evelyn Bortolotti. L é dapò l Sorastant Federico Corradini e con el l Consei de Procura à tout su e confermà i inomes designé dai desvalivs enc e sociazions pervedui da la lege: per l’ICL la diretora Sabrina Rasom, per l’APT Alice Dellantonio, per l’Union e la sociazions fascènes Nives Iori e Vanessa Tomasi; l Consei de Procura à en ultima nominà etres doi componenc, cernui desche raprejentanc del mond economich e cultural ladin dolomitich, te la persones de Claus Soraperra e Carlotta Nemela. Apede ai 10 componenc nominé, l é stat enciarià desche secretèr de la Consulta l dependent del CGF Riccardo Zanoner.
Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer. (Lucia Gross)
