La Usc di Ladins

I pearà via chest uton i lurieres per comedèr via l fon e i sotservijes del zenter veie de Cianacei, la pèrt de paisc loghèda dintornvia gejia de Sèn Florian. Chest intervent l é stat pissà da l’Aministrazion de Comun vidèda dal ombolt Giovanni Bernard per recalifichèr e valorisèr la spersa e poder endrezèr via tel davegnir na ZTL. Endèna con chisc lurieres, che revèrda più avisa la strèda da la pecaria Boninsegna fin ló da la Posta e en su fin sa la doana, vegnarà comedà l bosserlait e la rei de la èga biences e pazes. Soravia, fenii i lurieres, no vegnarà più asfaltà ma metù ju bolognins o granit, con dessegnes che ge va do a la pavimentazion de strèda de Dolavila, acioche sie uniformità e identità tel zenter storich.

L projet di lurieres per comedèr l zenter storich l era stat dat su jà del 2017 con l’aministrazion de Silvano Parmesani, lurà fora dal architet Alberto Winterle e dal enjegner Michele Senes. L é pervedù na speisa de en dut 1.152.000 euro.

Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Nicoletta Riz)