La Usc di Ladins

La era del 1927, suor Gisella Dellagiacoma dal Malghèr, ai 25 de mé l’aea compì 98 egn e da valch an la era vegnuda de retorn te la Talia do na vita de miscion passada tel Sud America, soraldut tel Ecuador. Da n par de egn la era te na ciasa per monie de età a Rosà e chiò la se à endromenzà, serena, en vender ai 26 de setember.

La era cresciuda te na familia olache se respiraa aria de miscion e che a le miscion la ge à dat 5 fies: trei frades de Suor Gisella, P. Vittorino, P. Carlo e P. Raffaele, i era jic te l’Africa coi comboniegn, suor Gisella, desche l fra più joen P. Alberto, coi salesiegn te l’America del Sud, olache P. Alberto l é amò, tel Ecuador.

Suor Gisella la era peada via de 23 egn, del 1950 envers l’Argentina. Do esser stata per beleche 20 egn te la “Terra del Fuoco”, del 1971 la é jita te l’Ecuador, olache l era ence so fra.

Con sia gran comunicativa la se à semper fat cognoscer e benvoler da duc. Tempruma la é stata te la selva amazonica a lurar coi shuar, dapò a Quito. Per egn l’à viajà per dut l Ecuador coi bus per far animazion e formazion miscionaria, la é jita ence tel Brasil e te autres stac de l'America Latina per tor part a seminaries, scontrade, corsc e ritiri, ence amò de 80 egn compii, tant da se vadagnar l sorainom de “pata caliente” (pe fers).

La saea semper co far a didar duc, ogneun aldò de si besegnes, metan a bon frut chel che soa jent e i gropes miscionaries ge dajea, ence travers le adozion da dalonc. La dijea semper: “vegnì a veder!” e l’à compagnà a vijitar l’Ecuador, da la sierra a la selva, n muie de fascegn che ades i la recorda con recognoscenza.

Suor Gisella no la podarà vegnir portada te Fascia per la sepoltura, la vegnarà recordada da la comunanza te trei messe, semper da le 6 da sera a Poza: en sabeda ai 27 de setember, en jebia ai 2 de otober e en sabeda ai 4 de otober. Che la pausse te la pasc del Segnoredio, ensema con si frades.

 (Lucia Gross)