La Usc di Ladins

Va inant i festejamenc per i 10 egn de atività del Coro Nosc da Soraga. Do l bel conzert che i ciantores à endrezà ai 29 de jugn a La Gran Ciasa con la partezipazion de La Mizacoles da Ciampedel, ades per ic l é ruà l moment de stèr senté ju sunsot paladina per ge lascèr lèrga a n auter grop de corisć.

Defat, chesta sabeda ai 27 de setember da les 9 da sera, te teater de Navalge se podarà scutèr n cor de nonzech del Trentin, un di più veies do l Cor de la Sat: l Cor Valsella.

Chest cor da mont de Borgo Valsugana l é nasciù del 1936, do aer regoet per egn paroles e melodies de la tradizion trentina, l à out sia atenzion e curiosità a la musega populèra di popui europeans e extraeuropeans, verjan l cher e l cef a na cognoscenza più lèria. N repertorie e na esecuzion de aut livel che i portarà ence te Fascia. »Con chest cor aon n raport de fradaa jà da cater o cinch egn – ne à dit l Maester del Coro Nosc Peter Decrestina. Gio cognoscee jà dant un di ciantores, ge aee domanà se assane podù jir ju a i scutar endana le proe e coscita l é nasciù chest bel raport. Con ic aon fat n conzert de benfizenza per l’ADMO a Pieve Tesino te la Valsugana e del 2024 i ne aea proponet ence de tor part al concors Romano Galvano. Ajache per nosc cedean di 10 egn de atività volaane enviar n cor de valuta aon pissà al Cor Valsella. Endana l conzert sarà ence n moment istituzional con la premiazion e l rengraziament ai corisć.«

L conzert é a paament al cost de 8 euro, se pel se comprèr i biliec dantfora. Duta la infos sui social del Coro Nosc.  

 (MCI)