La Usc di Ladins

»Desvalivanzes: comunanzes adum per na sozietà più giusta« l é l argoment de chest an de la Setemèna del Azet endrezèda dal CNCA – Coordenament Nazionèl Comunità de Azet del Trentin Sudtirol che l’à arjont sia undejeisema edizion.
Te la Setemèna del Azet, che sarà dai 26 de setember ai 4 otober, vegnarà endrezà evenc, scontrèdes e ativitèdes te duta la region per sensibilisèr la jent a la cultura de l’acolienza. Ence te Fascia l é pervedù trei scontrèdes per jir più a fon te chisc argomenc.

Sorafora la barieres architetoniches, la eles ti posć di omegn e la desvalivanzes vedudes dai bec

L prum apuntament l é pervedù en lunesc ai 29 de setember da da la does domesdì te sala de consei del Comun de Sèn Jan. La  scontrèda, endrezèda dal Comun General de Fascia en colaborazion co la sociazion AsTrID odv, l’à inom »Sorafora la barieres: istruzions per na mobilità più giusta e sostegnibola«e l’à met dant tant na esperienza pratica che ence n pensier teorich dintornvia problemes e consees per jir sorafora la barieres architetoniches.

En mèrtesc ai 30 de setember da les cinch domesdì te sala grana de la Sorastanza de la Scola Ladina de Fascia vegnarà metù a jir la seconda scontrèda, che à inom »Stories de eles che à fat sia l’autra corsia: l lurier de la eles ti posć di omegn«. 

Tinultima, en mercol al prum de otober da les cater a les sie domesdì, te sala del Zenter sozio-educatif Ensema se muda, la coprativa Progetto 92 met a jir n laboratorie che à inom »Valijes desvalives, viac medemo« per bec e bezes dai 6 ai 11 egn per pissèr con consaputa e a na vida creativa a la desvalivanzes e a la desvaliva ressorses a la leta aldò del contest olache se vif.
L laboratorie se serarà su co la creazion de n »bracialet de la equità« desche simbol del empegn personèl per n mond più giust. L laboratorie l é debant, con enscinuazion al n. 320/0761086, dant da en mèrtesc ai 30 de setember.

Se pel lejer dut su La Usc nr 37 dai 26 de setember, che se pel troèr ence te la boteighes de sfoes. Sul sit www.lausc.it se pel fèr l abonament al e-paper per aer azes vigni vender a dut l sfoi sul fonin, tablet o computer.  (CT)