La Usc di Ladins

L era da n muie de egn che Stefen Dell'Antonio Monech aea enjignà na verscion ence per fascian de 'Le Petit Prince', la contia scrita da Antoine de Saint-Exupéry doventèda n picol melaur poetich bon de soscedèr, te picoi e gregn, sentimenc de amor e pèsc con sèvia lejiereza.
Chesta produzion editoriala ge é stata dedichèda a Vigile Iori, se n jit de 62 egn ai 16 de dezember del 2022, na proponeta touta su con gran piajer da l'Union di Ladins e da la Scola, doi di tenc lesc olache Vigile à lascià sia pedia fona.
A la prejentazion tel Liceo artistich l era sche dut persones che à vivù, lurà, condividù vèlch con Vigile, vigniuna con si recorc de el. E te la sala esposizions l era 'sie' desch, con su l computer, papieres e lapisc, La Usc, libres e l dizionèr, e amò i veières, e ben segur zigarec e cendrin, e l corpet pojà sun cariega... aló, con paroles, musega, teater e auter, i amisc à volù proèr a se l chiamèr amò n'outa apede.
 (Lucia Gross)