La Usc di Ladins

Encuoi duta la comunité da Fodom l'a acolto e senté ite el nuof pleván e Degan da Fodom don Andrea Constantini "Ghea". Rué da Ampëz ca, ulache l é nasciù, don Andrea l a volù emprumadedut jì a ciaté la jent de temp a Vila S.Ijep. Sun plaza entánt el lo spetáva na gran fola de jent con davántfora el Capocomun Leandro Grones e i raprejentánc de dute le associazion de la val con sue mondure e guánc. Che don Andrea a saludé una per una e l a ence fat doi parole per le cugnësce. Al saludé ence tre colp de falconëc sbarei da scizeri, el Grop de Bal che a balé la Pairisc e la Bánda da Fodom che a soné "Ulà che la Marmolada" cantada da duta la jent. "Son jent da mont che ten a sua cultura, lengaz, storia e tradizion e son segur che chilò ciaparei na nuova gran fameia per caminé sul teriol de la spiritualité" i a dit el Capocomun nte le prume parole de salut. Entánt la perdìca don Andrea l a saludé per ladin ampezán la raprejentánza de suoi paejagn da Ampëz ruei al acompagné auna a suoi genitori e l s'a damané na orazion a la Madona de la Difeja. E per fodom l a saludé i suoi nuos parochiagn per rengrazié de l'acolienza. Deplù su La Usc de la setemana che ven.