La Usc di Ladins

"Al n’é mai ciamó sté n ann olache la sajun da d’invern ais adoré tan n gran sostëgn por desmostré la gran orenté da daurí les portes al turism da d’invern. Le Comité de Copa dl Monn arata che avisa porchël él n dovëi da confermé la desponibilité dl’Alta Badia por tó sö les gares de Copa dl Monn di ëi sön la Gran Risa", chëstes les parores de Andy Varallo, le presidënt dla Copa dl Monn a La Ila y impresar di lifc sciöche ince surastant de Dolomiti Superski. En chësc ann adoron energies lapró ala motivaziun che ne mancia mai por organisé manifestaziuns agonistiches y ince mëte en pe de gran iniziatives che é i pilastri de n turism de suzes. Avisa en gaujiun dl iubileum di 35 agn dla Copa dl Monn badiota saltel ite na "straordinarieté", nia orüda dai organisadus, mo azetada y desfirada le míu che ara vá. Plü saurí él te düc i caji stentusc da ne fá nia, lascé ester, ciaran sö tl cil, aspetan de mius tëmps. Ma che chësta passivité porta a püch, chësc sá ince i pioniers dl sport da d’invern y Marcello Varallo, che â porté adalerch laota la gara de Copa dl Monn a La Ila, al cunta: "I á fat tröpes copes dl monn y canche i sun gnü zoruch a ciasa, spo m’ái ponsé a tan bel che al foss sce i foss bun da porté düc mi compagns chiló a fá na gara y i odëi che ai gniss jö por la Gran Risa. Insciö ái metü man da baié y rajoné n pü’ cun la jënt che ess podü me daidé realisé chësc proiet: le Schi Club, la jënt da foradecá, i implanc cun inlaota surastant Erich Kostner. Tl pröm adorânse dër tröp aiüt manual, al ne ê nia tribünes che an podô mëte adöm, le box dles televijiuns, les rëis che é gnüdes cumprades dedó. La pröma atrezadöra é scialdi gnüda fata dala jënt dl post che á dé ca dis intiers por daidé. L’ entusiasm ê tan gran che cun n 'prëitambel' gnô düc a daidé. Düc â na ligrëza mata che an sintî tl aier, insciö él ince sté poscibl da organisé val’ de te’".

Liéde do deplü söles döes gares dla Gran Risa tla ediziun de La Usc di Ladins dodoman!  (Iaco Rigo)