La Usc di Ladins

En vëndres ai 4 de jügn é l'assessur por la scora ladina Daniel Alfreider y l'intendënta Edith Ploner jüs a vijité deplü scores dla Val Badia. En particolar ési jüs tles scores altes da La Ila, tla scora elementara da San Linert y tla scora mesana da San Martin de Tor. Te dötes trëi les scores á l'assessur y l'intendënta podü odëi sciöche al sides gnü fat de gran vari inant por ci che reverda l'adoranza de mesi digitai tratan l'insegnamënt, dantadöt te n ann de scora tan particolar, atoché dala pandemia. Tl zënter scolastich da La Ila é Alfreider y Ploner jüs a ciafé les cuintes classes, cun i 22 studënc y studëntes che s'arjigna da afronté l'Ejam de Stat. Tratan la vijita á la direturia Elena Pellegrini alzé fora sciöche l'introduziun di tesć nasai – y l'aprovaziun da pert de düc i geniturs – ais porté pro da podëi garantí l'insegnamënt en presënza, altamo al 75%.

Lingaz y cultura ladina por le dagní
L'assessur Alfreider y l'intendënta Ploner á spo vijité la scora elementara da San Linert y la scora mesana da San Martin de Tor en presënza dla direturia Claudia Canins (Badia) y Heinz Videsott (San Martin), rovan adalerch avisa tratan l'ora de ladin. “Por nos sciöche grup linguistich de mendranza él de gran importanza che le lingaz, la cultura, la storia ladina y insciö na pert de nosta identité fejes pert dl insegnamënt curricular”, á dit Alfreider. Tla scora mesana da San Martin él 37 scolares y scolars che se arjigna ca al ejam de conclujiun. L'assessur y l'intendënta á rengrazié döt le monn dla scora - scolares, scolars, insegnantes, insegnanc, direturies, direturs y families - por le gran impëgn mostré tratan chësc ann de pandemia, olache dötes y düc á ciaré da fá le poscibl por garantí l'insegnamënt sides en presënza co da ciasa.  (kp)