Inier, mertesc ai 28 de setëmber s'á i ostis dl comun de Badia abiné por lité le presidënt y le comité nü. Markus Valentini é gnü reconfermé ala presidënza; Marina Rubatscher Crazzolara á do 8 agn dé sö süa inciaria y se á trat fora dla Uniun di Ostis-Hgv
La sentada dla Lia di Ostis-Hgv é gnüda cherdada ite tla Ciasa dla Cultura da La Ila en mertesc ai 28 de setëmber domisdé. Por le pröm iade da canche al á scomencé la pandemia án indô podü se incunté te n salf, olache al é rové adalerch 32 di 124 ostis scric ite tla Uniun. La sentada á metü man cun le salüt da pert dl presidënt, Markus Valentini, che á metü sön mësa deplü tematiches che é spo gnüdes tratades tratan la reuniun, danterater la realisaziun di trus dles rodes, la mobilité, le »overturism« y i Mondiai de schi che n'é nia gnüs dá pro dal Comun.
Marina Rubatscher Crazzolara se tira zoruchDo da ot agn ala presidënza dla Uniun di Ostis dal Val Badia, á Marina Rubatscher
Crazzolara tut la dezijiun da se trá zoruch. L'ostira é gnüda rengraziada dai ostis te salf y dal presidënt che á albü parores de lalt por ëra: »T'as lascé na merscia sota te nosta Uniun, giulan por to engagement, por les idees y por le idealism che t'as porté inant tratan chisc ot agn«, ti á dit Valentini. Rubatscher Crazzolara á recordé en cört les ativités y i proiec che ara á invié ia sciöche surastanta dla Uniun, en particolar ára recordé la colaboraziun cun les scores, cun l'ITE da La Ila y cun la scora da hotelaria da Bornech y la gran importanza da se dé jö cun i jogn y cun les jones che é le dagní dl turism. Inant ti á l'ostira aodé döt le bun al presidënt y al consëi nü, se auguran che al pois se svilupé tla Val Badia na cultura dla discusciun »Se incunté y baié di problems, ascuté sö ci che atri á da dí é fondamental por podëi afronté les chestiuns. Ma na comunité che tëgn adöm, cun tesciü sozial sann pó fá n turism sann«, á stlüt jö la ostira.
Deplü te "La Usc di Ladins" che vëgn fora en vëndres ai 1. de otober. (kp)
