Te deplü scores elementares dla Val Badia, en particolar tla direziun scolastica d'Al Plan, él preodü che i scolars vais a scora cina les döes domisdé, ciafan vigni de la marëna. Chësc se damana ince deplü families de mituns y mitans che vá a scora tl'alta Val Badia, mo al momënt ne vá chësta ghiranza nia da ejaudí. I nen ún baié cun la direturia dla direziun dles scores de Badia, Claudia Canins
En ocajiun dla reuniun dl consëi di geniturs dla direziun raionala de Badia él ince en chësc ann indô gnü metü sön mësa le tema dla refeziun. Deplü geniturs de mituns y mitans che vá tla elementara, á damané che al vëgnes tut en conscideraziun la poscibilité da pité la marëna vigni de, mudan i orars de scora. L'ejëmpl án dales scores dla direziun d'Al Plan, olache i scolars y les scolares mët man dales 7:50 y á spo leziuns vigni de cina les 14.10. Danterite ciafi la marëna. Tles scores elementares di paisc dl'alta Val Badia á i mituns y les mitans indere dui dis al'edema scora domisdé, le mertesc y la jöbia, cina les 15:35; n orar, chësc, che vëgn araté da deplü scialdi lunch y sfadius, dantadöt por i plü pici.
Canche al é scora ince do marëna, ciafa i scolars la refeziun. A Corvara vá i mituns a mangé te n restorant o, aladô dla diponibilité, vëgn la marëna cujinada da n restorant y tenüda sön mësa tl salf dles uniuns. A San Ciascian mangia i scolars y les scolares te porte la marëna che vëgn cujinada dala cöga dla scolina. A La Ila y a Badia pó i mituns y les mitans jí a mangé te restoranc che pita chësc sorvisc y a La Val él na ciasadafüch te scora, olache i mituns ciafa la marëna. »Al n'é nia le pröm ann che le tema dla refeziun vëgn metü sön mësa da pert de geniturs che se damana n adatamënt di orars de scora y la poscibilité por i scolars y les scolares da ciafé vigni de la marëna. Mo ara se trata de na minoranza«, nes dij l'assessur ales scores dl comun de Badia, Werner Pescosta a chël che ti damanun sciöche ara se stá cun le proiet por la realisaziun dla scolina nöia da La Ila, olache al messass garaté lapró na mensa y na palestra che gniss spo anuzades ince dai scolars y dales scolares dla elementara: »Ara se trata de n proiet de za. 4 miliuns de euro che le comun de Badia n'á al momënt nia a desposiziun y dal Stat ne ciafunse gnanca le contribut che i ân damané do, porchël él al momënt chit«, nes respogn l'assessur. Por ci che reverda le sorvisc de refeziun y la ghiranza da mudé i orars de scora, unse contaté la direturia Claudia Canins, a chëra che i ti ún fat n valgönes domandes.
L'intervista podëise lí tla ediziun d'La Usc da en vëndres ai 26 de novëmber.
