La Usc di Ladins

Da plü agn incá laora l'aministraziun dl comun da Corvara por ciafé na soluziun al problem dla racoiüda y dl reziclaje dl refodam. Insciö pënson bele da n pez incá da smendrí o tó demez les ciampanes fora por paisc, tignin fora insciö scich y tof. Le proiet por la realisaziun de isoles ecologiches é gnü arforé a Corvara da n recurs; a Calfosch vëgnel lauré inant, mo la orenté dl ombolt Robert Rottonara é chëra da fá n vare important bele por chësta sajun da d'isté. Mantignin ci che ê gnü impormetü, á l'aministraziun lascé al savëi che cun le 1. de jügn gnarál tut demez feter dötes les ciampanes dal papier, dal spidl y dai bossi; chëstes sorts de refodam messará gní condütes tla desćiaria de Col Maladët. Les ciampanes ê gonot suraciariades, en particolar tratan les sajuns turistiches y canche al gnô condüt adalerch ciomënt da pert de hotí, restoranc, üties y botëghes. Le refodam che n'â nia lerch te ciampana gnô lascé ia por tera, gaujan scich y tof te paisc. Ciampanes gnarál lascé ma te dui posć: tres la strada Rütort a Corvara, dlungia le cantier de comun y a Calfosch tla localité Sotdlijia. Inant restarál ince les baraches dal cartun, olache an podará lascé jö i sac vërc. Le refodam organich, che ne pó nia gní dé jö jö en Col Maladët, gnará inant coiü adöm da pert dla firma inciariada.

Deplü t'La Usc di Ladins che vëgn fora en vëndres, ai 27 de ma.   (kp)