Lara Malsiner de Gherdëina à fat si prim podest te Copa dl Mond de saut cun i schi, coche repurton nce tl articul sun la plates de sport te chësta edizion de nosc foliet.
La ie te na bona cumpanìa, de jëuni de Gherdëina che à fat bën te Copa dl Mond: Nicol Delago à bele venciù doi bedaies te Copa dl Mond de schi, Alex Vinatzer ie ruvà terzo tl slalom de Zagreb, per ne desmincë nia si autri bon resultac, nce pra i Mundiei a scuadres, Daniele Bagozza ie ruvà n iede prim y n iede segondo te Copa dl Mond de snowboard.
Gherdëina ie tl lëur de fé l fat y sie, n con' de atlec y atletes de livel mundiel. Gherdëina che ie pars pro toto per duta la valedes ladines. Tla Ladinia iel na gran tradizion, na gran cualità de furmazion y pona de resultac. L ie zeche scialdi de positif, ajache i atlec y la atletes porta l inuem de nosta valedes ora per l mond, ma l ie dantaldut zeche de positif per ëi/ëiles, ajache i/les ie boni/es de arjonjer resultac de marueia, de gra a si cumpetënza, si mpëni y si arteniënza. Cumplimënc ai atlec y ala atletes, ai Schi Clubs y ala scoles de nosta valedes! De gra nce ala politica sce la uel inant dé n sustëni sun mesura.
Sambën che l toma nce tl uedl – tucan fier – tanc che se à fat mel, ultimamënter, mé per dì a livel de naziunela de schi taliana. L vën tlo su la dumanda sce l ne sibe nia unì arjont n livel massa sëuramenà. A livel de material y de tecnica iel al didancuei do la rata saurì che n se feje mel. L sëurameinamënt taca nce adum cun l pëis psichich, rati. Massa granda ie la prescion pra i mutons y la mutans che fej sport agonistich. Sambën che jì a fé muradëur uni di dala 6-7 daduman ie n majer pëis. Ma per resté tl ciamp: l ie drët ti recunëscer nce a nosta jëunes y a nosc jëuni n suzes sun mesura, ne ti ciarian nia su massa prescion de messëi vëncer.
L ie drët che l vënie nce tenì cont de ëi/ëiles coche persona, cun si carater, si ana, si psiche. Lascionsi vester persones, no mascins: tan plu bel saràl canche la ti buta. (de David Lardschneider)
