La Usc di Ladins

La Usc Valentino, posto te prejentà n curt?
Valentino Dall'Acqua ai inom Valentino e son nasù del 1990. M'ai laureà in Geologia a Padova, ma ades faje l cuogo a Fribourg, ntel Canton Fribourg ulà che se descor todesch e franceje.

E come asto fat a ruà in Svizera?
Son ruà debota per cajo. Darè che ai ciapà la laurea son ju n Scozia a imparà l ingleje, e canche ai vidù che ilò no l eva de gran prospetive né come cuogo né come geologo, son tornà in italia per doi mesc e chel momento n amigo che vif in Svizera l m'à dit de jì a provà ilò.

Come vedie i svizeri chi che ven da fora per laurà in general, e i taliagn ntel spezifico?
No se pol generalizà. Dijon che i scomenza a te tratà a na moda normale e a ester manco razisti (parceche ilò i é saldi razisti) canche i sa che t'as studié, o che te pol portà valch al pais che no sie domà fà l manoal. Po bogna dì che mi son ntel canton franceje, ulà che i é manco ujai ai taliagn: no come n Ticino, ulà che i taliagn i ven vidui saldi mal. Mi no ai mai bù problemi, ma no l é saurì se fà dei amizi e che i te dai confidenza. Zerto i te azeta se te te comporte pulito, te rispete la lege e te laore.