La Usc di Ladins

En domenia ai 9 de firé tel zenter de paslonch de le Viote sul Bondon, per endrez del Gs Marzola Asd, l’é stat metù a jir l 6° Trofeo APT Trento Monte Bondone e 17° Trofeo Cassa Rurale de Trent, per duta trei la circoscrizions A, B, e C di zircuic Conad, Casses Rurales del Trentin e Itas Mutua, per la categorìes Baby, Cuccioli, Ragazzi e Allievi.

Te la stafeta sprint mescedèda, anter i Allievi bel suzess per l joen fascian Giovanni Fanton de l’U.S. Monti Pallidi, che se à vadagnà l titol de campion provinzièl ensema con Alessia Togni del Sci Club Sesvenna che la fèsc l Ski College a Malles. I doi joegn del 2004 i à corì l percors tel temp de 25’ 09.4, ruan 19 seconc dant dai etres. Al 2° e 3° post l’é  ruò 2 team de Val di Sole. 

N bel 5° post l’é stat arjont da la fascèna Gloria Gabrielli adum con Christian Leso, duc doi de la Dolomitica e del Ski College de Fascia. Al 10° post troon Stefano Mazzel, ence el fascian del Ski College, ensema con Elisa Longo de la Cornacci e al 17° n auter fascian del Ski College, Damiano Rasom, ensema con Francesca Iellici de la Cornacci. Ti miores 20, al 19° piazament, troon amò Valentina Merler de la Monti Pallidi con Matteo Franzoni de la Polisportiva Molina. 

I atlec ladins se à metù al luster ence anter i più joegn de la categorìa Ragazzi, venta da Natasha Boninsegna e Luca Ferrari de la Dolomitica. Chiò Ilenia Gabrielli da Pera se à vadagnà l 10° post ensema con Cristian Ceol de la Dolomitica, e de la medema sozietà troon ence la jomelines fascènes Elena e Giuditta Mazzel respetivamenter al 22° e 23° post en cobia con Matteo Moser de la Castello e Simone Dagostin de la Stella Alpina.  (Lucia Gross)