La Usc di Ladins

Katazina Sosna: "Magari ie chësc l drë' ann"
L'atleta lituana: "Duman me aspeti n bel di. Magari sons finalmënter bona de vëncer chësta Hero (rij, ndr.)." Sosna à tlo fat referimënt a si podesć pra la Hero, segonda tl 2018 y terza tl 2019.

Urs Huber: "L majer averser ie l percurs"
L svizer ruvà terzo tl 2018 y segondo tl 2014 y 2019 pra la Hero Dolomites: "Ne me feje nia massa pensieres per duman. Ie vede ite te chësc percurs scialdi rie y feje chël che muesse fé. L majer averser ie tlo l percurs."

Lakata Alban: "A ciacia de Paez"
L atlet austriach, bedaia d'or pra la Hero Dolomites tl 2015, ann te chël che l ie deventà campion mundiel, à riesc fat ntënder si ntenzions: l favorit ie l colombian Leonardo Paez, y ël uel "jì a ciacia". 

Tony Longo: "Tlo per l podest"
L atlet talian à culeziunà n cuarto y n valgun cuinti posć pra la Hero Dolomites ti ani passei. "L me mancia mo l podest. Me é njenià ca per chësc."

Kristian Hynek: "La Republica Ceca tlo per vëncer"
L atlet dla Republica Ceca à dit che l ie njenià per la garejeda de duman. "L ubietif per nosta scuadra ie de purvé a vëncer, danter mé y Martin Stosek. Plu gën ëssi bën sce ie vencësse (rij, ndr.). La cumpetizion ie tlo for scialdi granda, la natura for scialdi bela."

Leonardo Paez: "Mo plu ciarià da campion dl mond"
L atlet colombian, sies iedesc sun l scialier plu aut dl podest dla Hero Dolomites, n iede sun l segondo scialier y n iede sun l terzo, ie dessegur l atlet da bater. "Duman fajerei la garejeda cun truepa autocuscienza. Son mo plu ciarià ajache fajeré la garejeda cun ados la malieta da campion dl mond. Son calm, ma sënte bën nce mpue la tenscion."

Renato Di Rocco: "Valores dl respet dl ambient"
L vizepresidënt dla UCI, la Union Nternaziunela de Chëi dala Rodes, à dit: "Do diesc edizions iel bel a udëi che i valores dl respet dl ambient, dla inuvazion dl green, ie mo plu zentrei. De gra ala Hero per l cuntribut che la dà al mond dla rodes. La ova scumencià dan dodesc ani cun mpue de tëma, ma urmei àla si lerch, si posizion, te dut l mond."

Gerhard Vanzi: "De gra a duc per si lëur"
L presidënt dla Hero Gerhard Vanzi rejona de na edizion, de n ann n generel, riei: "De gra al lëur de duc canc sons śën tlo." Nce Vanzi à auzà ora la mpurtanza y la zentralità dla ecosustenibltà de chësta edizion, che vëija per l servisc de trasmiscion tla televijion mé motors y quads a lectrisc y n sponsor che ie unit mé cun auti a lectrisc o hybrid.

Peter Runggaldier: "Cumplicazions pervia dla nëif"
L diretëur de garejeda dla Hero Dolomites: "On abù truepa cumplicazions pervia dla truepa nëif de dezëmber y de jené. Śën ons tramedoi percursc te na bona cundizion. L ie vel' mudazion ti percursc, coche per ejëmpl pra l Jëuf de Pordoi a Ciampedel."

Roland Demetz: "Sudesfazion a udëi Sëlva inò nsci"
L ambolt de Sëlva à auzà ora "la gran sudesfazion a udëi l luech de Sëlva inò cun truepa jënt te chisc dis, do che son stai da sëui per truep mënsc. Chësc ie n sëni de speranza. 
De gran cumplimënc per l'urganisazion, nia mé pervia dla cumplicazions che à purtà la pandemia, ma nce per i troies njeniei ca tan bën, do che l à fat tan de nëif."

Michele Cazzola y Paolo Appoloni: "La Hero ie n referimënt per nëus"
L cunselier dla FCI, la Federazion Taliana de Chëi dala Rodes, y l presidënt dla sezion de Südtirol dla FCI à auzà ora coche la Hero ie n evënt de referimënt per dut l mond dla rodes y dla mountain bike.