La Usc di Ladins

L an che vegn, del 2027 l Trofeo Contrin destudarà 50 ciandeiles, n travert zis emportant per una de la manifestazions sportives con più egn sun la schena e anter i apuntaments più aprijié per i atlec de cèsa.

En domenia ai 30 de aost l é stat coret la 49^ edizion del Trofeo Contrin, marcia no competitiva che pea via da Dèlba per ruèr fin sunsom la Val, ló da la utia Contrin fata jir da la familia Debertol, che se cruzia del endrez. L percors de la garejèda l é lonch presciapech 6 chilometres, con n deslivel positif de 500 metres; se à scrit ite ence chest an n centené de partezipanc. A se portèr a cèsa l mior temp assolut de 29’15’’ l é stat l atlet da Vich Mauro Rasom; te la medema categoria, secont mior temp l é chel de Francesco Bucciarelli, enciasà a Poza. La miora anter la eles l é stat enveze Costanza Di Bello; secondo mior temp assolut l é stat Laura Lorenzini, femena de Mauro. Anter i partezipanc l era ence l atlet talian Marco Olmo, venjidor de sacotenc ultra trail, clas 1948.

Do la premiazions, la giornèda é amò jita inant con de bona speisa e la musega de Giordano Costa.

Dut l articol su La Usc stampèda de en vender ai 4 de setember del 2026


 (Nicoletta Riz)