La Usc di Ladins

In poche dis ‘l é duto mudà: in Anpezo ‘l é danoo alcuanta parsones che s’à marà de Covid-19. Dinprin s’in contaa tre, ma da ‘na setemana a cher’outra ‘s é deentades noe, donca tre otes tanto. Se sà che sta marescia ‘l é fazile se ra petà un co ‘l outro, parcé che sto virus el viaśa sbelto. Dapò ‘l é outra tre parsones sarades in ciaśa, parcé che ‘s é stades pede a i marade. «I à ciatà calche luó, agnó che ‘l é parsones marades, ma par fortuna somea che i see pitosc sarade – disc el capocomun Gianpietro Ghedina Crepo – e son ca a domandà, ‘na ota depì, de pensà sora a chel che se fesc; dute nos ón da fei algo par nos e par ra comunità. Beśen aé rispeto par ra regoles e ‘l é da fei dute ra variola, anche chi pi śoen».