La Usc di Ladins

L’é stat l maester Paolo Rasom, ensema con na picola delegazion de musegante e marchetenderes, a tor pèrt a la radunanza del Fassa Coop en sabeda ai 8 de firé te la palestra de Sèn Jan per ritirèr, ence a inom de la presidenta Daniela Favè che no podea tor pèrt, l prestigious “Premio Fassa”.

L’é oramai da 26 egn che, en ocajion de la radunanza di sozi per l’aproazion del bilanz, l Fascia Coop ge sporc chest bel recognosciment a na sociazion o na persona che à dat o dèsc n contribut a sia comunanza.

Ti egn passé l’era jà stat premià la trei Museghes de Poza, Vich e Moena e chest an l Consei de aministrazion de la Coprativa à dezidù de ge sporjer l pest a la Musega Auta Fascia. L president de la Coprativa Emilio Gross de Śoan e l diretor generèl Luca Giongo ge à sport la targa ai raprejentanc de chest grop, con la motivazion che con sia notes la Musega Auta Fascia la fèsc esser stolza duta la val e la deida a slarièr fora sia cultura.
Apede al chèder ge é stat consegnà ence la soracuerta con l contribut finanzièl che é pervedù da chest recognosciment.

A la Musega Auta Fascia, ativa oramai da 14 egn, ge é jit l batiman fort de duc i sozi prejenc, passa 450.

De più su la radunanza su La Usc stampèda de vender ai 14 de firé.  (Lucia Gross)