La Usc di Ladins

L Comun general de Fascia gestesc dal 1986, per delega di Comuns de la val, i servijes de regoeta, trasport e desgorta di refudames. Te chisc egn l servije l’é mudà n muie ajache ence Fascia à cognù ge jir dò ai ajornamenc del Pian provinzièl de gestion di refudames de la Provinzia de Trent che obliga i gestores de la regoeta del refudam, te nosc cajo belapontin l CGF, a tor sù la neva diretives e reorganisèr dut l sistem.

A la fin del 2014 l’é stat aproà l 4° ajornament che comporta na lingia de neva azions operatives, anter chestes ence la standardisazion de la regoeta desferenzièda a na vida che sun dut l tegnir de la Provinzia sie n soul model de gestion de la regoeta e de la desćèria tant per chel che vèrda i aspec tecnics che economics e finanziaries. 

La Provinzia de Trent à fat fora che sun dut l teritorie vegne binà sù l refudam a la valiva maniera e la neva più emportanta de chest ajornament l’é stat apontin chela che revèrda la regoeta de tetrapak, bossoi e cocoi de aluminie. Te Jonta del Comun general de Fascia jà a la fin del 2015 l’é stat aproà n pian de investiments per l’adeguament al nef model che perveit la regoeta de chisc materiai ensema a la plastica e no più despartii con vierech e papier. A chesta vida tel vierech cognessa vegnir metù demò vierech e tel papier demò papier e dut l’auter ensema con la plastica.

Su La Usc stampèda de vender ai 6 de november l responsabol Stojan Deville deschiaresc duta la situazion.  (Monica Cigolla)