Dò la radunanzes de Moena e Ciampedel, en sabeda ai 10 de oril l’é stat chiamà ite en modalità telematica ence l’apuntament sozièl de la Coprativa de Fascia.
Via per de mèrz tel Fassa Coop e duta sia desvaliva boteighes i sozi à ciapà la documentazion per tor pèrt a la radunanza, da consegnèr da nef dò l’aer scrita ite.
L’é stat binà ben 1229 schedes su 1800 letres manèdes fora, a la radunanza en prejenza per solit n vegn regoet 450/500.
Sul canal Youtube de la Coprativa l’é stat metù al luster en videoconferenza l resultat de ejercizie e la oujes più segnificatives del bilanz 2020, dapodò l’é stat moscià i lurieres per la realisazion del nef magasin. L’era ence possibol interagir travers na chat ma beleche nesciun se n’à emprevalù.
L responsabol aministratif e vize diretor David Pisoni à metù al luster e deschiarì la oujes più de segnificat del bilanz a na vida chièra e sorida. En cont de l’utol de 541 mile euro l’à spiegà che te la ousc l’é ence entrèdes straordenères per presciapech 230 mile euro. Zenza chisc emporc l’utol fossa de 310 mile euro, 615.000 manco che l’an dant, soraldut per via del smaorament di cosć del personal e l smendrament del faturat.
Dut l'articol é da poder lejer su La Usc stampèda de vender ai 16 de oril.
(Cristina Marchetti)
