N istà rich de atività per la biblioteca de Cianacei

Data

23 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Desche ogne an la biblioteca de Comun vidèda da Domenico Volcan porta inant la scontrèdes per l’istà.
Rich, dassen rich e chest an ence più desvarià l program metù dant da la biblioteca de comun de Cianacei per l’istà 2021. La voa de ge sporjer vèlch a la jent dò i despiajeres e i ujes seré porté dal Covid-19 la é grana, e ence chest à spent l bibliotecarie Domenico Volcan a endrezèr scontrèdes de desvaliva sorts con libres, ma ence musega e filmac.

Evenc metui dant semper ti egn da biblioteca e aministrazion ti meisc de messèl e aost e che slèria na proponeta culturèla dassen enteressanta. N program de enteress turistich, ma ence pissà per la jent del post che chest an podarà recordèr fegures emportantes per Fascia, desche Richard Löwy, troèr amò scritores che jà ti egn passé se à fat cognoscer te val e scontrèr ence autores locai desche Alberta Rossi.

No demò libres, ma ence musega per fèr amò più completa la perferida e desmostrèr l fort leam artistich anter l mond de la schertura e chel de la notes.

»Ence chest an aon cernù de far cheste scontrade – ne à dit l bibliotecarie Domenico Volcan - che le sarà desvalive, adertura 14. Valch scontrada la é con autores che l’é jà stat chigiò desche Cinzia Tani, Ritanna Armeni o Licia Campi Pezzi, valch autra con neve proponete e ence valch conzert, per ejempie con la musega klezmer che sarà en ocajion de la scontrada su Löwy de aost. L’é musega che à vindò n studie, valch de valuta che crese sie giust cognoscer e che la biblioteca te sia funzion cognesse ence vardar de meter dant. Pense che sie de bele scontrade, ge tegne a dute, ma en particolar a chela di 31 de aost canche sarà n conzert de vidole con l grop Alda Merini de Ciavaleis per zelebrar ence i 40 egn de la biblioteca e l lurier fat te duc chisc egn«.

Dut l program de la scontrèdes é da poder lejer su La Usc stampèda de vender ai 18 de jugn.  (Daniele Verra)