La Usc di Ladins

La Pro Loco de Vich aur col prum apuntament la sajon da d’istà ti ‘Borghi più bie de la Tèlia’ che chest an se met dant de valorisèr più che dut la frazion de Sèn Jan.

Chiò en sabeda ai 26 de jugn vegn endrezà la Net Romantica, n event anter èrt e musega. Via per dutoldì, da les 10.00 a les 18.00, duc i enamoré pel jir ti 6 borghi de Vich per se fèr n retrat con 3 cheres checegn creé aposta per l’event che se troa stroz ti ciantons più bie.

Da les 16.30 l’apuntament l’é tedant al Museo Ladin che se pel vijitèr al priesc spezièl de 3 euro. Per chesta ocajion vegn metù fora la operes di artisć fascegn Matthias Sieff e Davide Deflorian.

Da les 21.00 tel pra vejin a l’Istitut Cultural Ladin vegn portà dant l conzert de Francesco Camin, aprijià artist trentin che à giusta vent l pest "Dalla"; te sia band a la bateria l'é ence Daniele Volcan da Moena.
La jent se sentarà jù su la cuertes te pra, per aer n contat sćiantif con la natura e la musega. A la fin del conzert vegnarà dat fora a duc n bon té de l’azienda agricola »Fiores« sport da la Pro Loco de Vich. Per aer maor informazions se pel jir sul sito internet www.entornvich.com.